Mingəçevir şəhərində QHT-lərə 3 günlük təlimə start verilib

Mingəçevir şəhərində Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi tərəfindən təşkil edilən “QHT-lərin 1-ci İnkişaf və Mübadilə proqramı”nın açılış mərasimi keçirilib.

Mərasimdə Azərbaycan Respublikası Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva, Prezident Administrasiyasının məsul əməkdaşları Əli Pənahov, Samir Məmmədov, qeyri-hökumət təşkilatlarını təmsil edən, təlim üçün müsabiqədən keçən iştirakçılar, media nümayəndələri iştirak ediblər.

Tədbiri açılış nitqi ilə açan Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva qeyd edib ki, “QHT-lərin 1-ci İnkişaf və Mübadilə proqramı” ilk dəfədir Agentlik tərəfindən başlayır və bu proqram davamlı olaraq təşkil ediləcək. Düşünürük ki, bu təlimlər QHT-lərin Layihələrin yazılması və idarə edilməsi sahəsində bacarıqlarının daha da təkmilləşdirilməsinə töhvə verəcək. A.Əliyeva qeyd edib ki, proqrama qeydiyyatdan 259 Qeyri-hökumət təşkilatı keçib və müsahibə zamanı onlardan 110 nəfər təlimlərdə iştirak hüququ qazanıblar. İştirak edə bilməyən təşkilatlar üçün təlimlərin davam etdirilməsi nəzərdə tutulub.

Daha sonra Azərbaycan Respublikası Prezident Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Vüsal Quliyev çıxış edərək təşkil edilən proqramın əhəmiyyətini vurğulamışdır:

“Qeyri-hökumət təşkilatlarının fəaliyyətinin gücləndirilməsi, davamlılığının təmin edilməsi, təşəbbüskarlıqlarının artırılması, xarici partnyorları ilə rəqabətə girməsi üçün mütəmadi əsasda bilik və bacarıqlarının artırılması istiqamətində əməli işlərə ciddi ehtiyac var.

Əvvəlki illərdə bu istiqamətdə müəyyən fəaliyyətlər həyata keçirilsə də sistemli xarakter almamış, ehtiyaclara uyğun təşkil edilməmişdir. Yalnız “QHT Məktəbi” proqramı davamlılığını təmin edə bilib.

Apardığımız müşahidələr göstərir ki, hər il xeyli sayda qeyri-hökumət təşkilatı yaranır. Lakin, onların böyük əksəriyyəti zəruri təlimlər almadan bu işə başlayır, kor-koranə fəaliyyət göstərirlər. Biz bu halı onların təşkilati idarəçiliyində, layihə tərtibatlarında, yerli ehtiyacları öyrəndiklərində, layihələrin icra olunmasında və s. aydın görürük. Bəzən layihə təşəbbüsləri donor təşkilatlar tərəfindən müsbət qiymətləndirməyən QHT-lər günahı özlərində axtarmırlar. Sonradan məsələni araşdıranda məlum olur ki, QHT-nin təcrübəsizliyindən və layihələrin keyfiyyətsiz yazılışından donor haqlı qərar qəbul edib.

Bu gün QHT-lərin bilik və bacarıqlarının artırılması qarşımızda duran vəzifələrdən biridir. “QHT-lərin 1-ci İnkişaf və Mübadilə Proqramı” qeyri-hökumət təşkilatları üçün gözəl fürsətdir və burada keçirilən təlimlərdən faydalanmaları onların fəaliyyəti üçün ciddi nəticələr verə bilər”.

Açılış nitqlərindən sonra təlimlərə start verilib.

Təlimlərin birinci günü iştirakçılara “Dataların yığılması və təhlili”, “Logframe – Məntiqi çərçivənin hazırlanması və dizaynı” mövzularında təlimlər keçirilib. Təlimlər ADA Universitetinin Beynəlxalq və İctimai Münasibətlər İnstitutunun dekanı Anar Vəliyev, beynəlxalq ekspert Vüsal Behbudov tərəfindən aparılıb.

Təlim zamanı iştirakçılara mövzularla bağlı nəzəri biliklər haqqında geniş məlumat verilib və iştirakçıların mözvu ilə bağlı sualları cavablandırılıb.

QHT dövlət dəstəyi agentliyinin icraçı direktoru Aygün Əliyeva jurnalistlər açıqlamasında bildirib ki, 300-dən çox QHT nümayəndəsi bu proqramda iştirakını bildirib. 110 QHT nümayəndəsi iştirak hüququ qazanıb:

“Bildiyiniz kimi ötən ilin aprel ayında ölkə prezidentinin müvafiq sərəncamı ilə QHT-larına dövlət dəstəyi agentliyi yarandı. Agentliyin nizamlanma səlahiyyətlərindən biri QHT həm maliyyə həmdə metadiki yardım gösdərmək idi. Bu xüsusidə QHT-nin birinci inkişaf mübadilə proqramı ilk təşəbbüsdür. Bu mübadilə proqramı ilə bağlı 1 ay öncədən başlayır. Açıq şəkildə elanlar verilib. 300-dən artıq QHT bu proqramda iştirakını bizə bildirib. Müxtəlif mərhələlərdən sonra hən sənətlərin texniki seleksiyası, həmdə eyni zamanda intervyu məsələsindən sonra 110 QHT nümayəndəsi burda iştirak hüququ qazanıb. Təlim 3 gün boyu Mingəçevir şəhərində baş tutacaq. Bu gün burda həm regiom QHT-ı, həmdə mərkəz paytaxta fəaliyyət gösdərən vətəndaş cəmiyyətinin nümayəndələri iştirak edir. Onlar təlim boyu Logframe hazırlanması, məntiqi çərçivənin tərtib olunması, Layhələrin yazılması, data bazanın yığılması, analiz edilməsi və bir çox mühüm mövzularda təlimlər keçəcəklər. Sonda isə yekun işi yəni praktik iş onlar üçün təşkil olunacaq. Əminik ki, bu təlim QHT-nın bilik və bacarığını artırılmasına, onların bir-birilə təcrübə mübadiləsinə eyni zamanda gələcəkdə beynəlxalq partnyortlarla iş sahəsinə də fəaliyyətinə öz müsbət səmərəli təsirini gösdərəcək”.

ƏvvəlkiCüdo üzrə Azərbaycan millisi EYOF-da növbəti qızıl medalı qazanıb
NövbətiKəlbəcər və Laçında yerləşən mövqelərimiz atəşə tutulub