Qadın güləşçimiz Avropa çempionatında gümüş medal qazanıb

Qadın güləşçimiz Elis Manolova Macarıstanın paytaxtı Budapeştdə keçirilən Avropa çempionatında gümüş medal qazanıb.

AZƏRTAC xəbər verir ki, yarışın dördüncü günündə – martın 31-də Elis Manolova (65 kq) mübarizəyə qoşulub. B qrupunda yer alan təmsilçimiz ilk görüşdə Avropa ikincisi Tatyana Rijkoya (Ukrayna) məğlub olub – 0:7. Güləşçimiz qrupda sonuncu görüşünü estoniyalı Viktoriya Essoya qarşı keçirib və rəqibinə 6:3 hesabıyla qalib gəlib. Qrupda ikinci yeri tutan Manolova yarımfinala yüksəlib. Millimizin üzvü 2019-cu ildə qitə çempionatının finalında məğlub etdiyi Krişta İnçe (Rumıniya) ilə qarşılaşıb. Gərgin mübarizə şəraitində keçən görüşdən minimal fərqlə (2:1) qalib gələn idmançımız dördüncü dəfə Avropa çempionatının finalına yüksəlib. Güləşçimiz qızıl medal uğrunda həlledici görüşdə aprelin 1-də ukraynalı Tatyana Rijkoyla mübarizə aparıb. Rəqibinə 0:4 hesabı ilə məğlub olan təmsilçimiz yarışda gümüş medalla kifayətlənib.

Qeyd edək ki, qitə birinciliyinə aprelin 3-də yekun vurulacaq.

ƏvvəlkiPakistanın Baş nazirinə sui-qəsd planı hazırlanıb
Növbəti“Nağıllar aləminə səyahət” adlı dərnək yaradıldı