Yaponiyanın yeni səfiri etimadnaməsinin surətini Azərbaycanın Xarici İşlər nazirinə təqdim edib

Avqustun 14-də Azərbaycanın Xarici İşlər naziri Ceyhun Bayramov Yaponiyanın ölkəmizə yeni təyin olunmuş səfiri Cuniçi Vada ilə görüşüb. qəbul edib.

Xarici İşlər Nazirliyinin Mətbuat xidməti idarəsindən AZƏRTAC-a bildiriblər ki, görüşdə səfir Cuniçi Vada etimadnaməsinin surətini nazir Ceyhun Bayramova təqdim edib.

Nazir Ceyhun Bayramov Cuniçi Vadanı Azərbaycana səfir təyin olunması münasibətilə təbrik edib və ona gələcək fəaliyyətində uğurlar arzulayıb.

Görüşdə Azərbaycan ilə Yaponiya arasında ikitərəfli münasibətlərin müxtəlif sahələrdə uğurlu inkişafı qeyd olunub. Xüsusilə siyasi, iqtisadi, mədəni, turizm, kənd təsərrüfatı, təhsil və digər sahələrdə əməkdaşlığın cari səviyyəsindən məmnunluq ifadə edilib və əlaqələrin daha da inkişaf etdirilməsi üzrə fikir mübadiləsi aparılıb.

Nazir Ceyhun Bayramov Yaponiya səfirinə Ermənistan-Azərbaycan Dağlıq Qarabağ münaqişəsi barədə məlumat verib, bölgənin təhlükəsizliyinə ən böyük hədə olan münaqişənin həlli ilə bağlı Azərbaycanın beynəlxalq hüququn norma və prinsiplərinə əsaslanan mövqeyini qarşı tərəfin diqqətinə çatdırıb. BMT Təhlükəsizlik Şurasının qətnamələri başda olmaqla, beynəlxalq ictimaiyyətin münaqişənin həlli ilə bağlı sərgilədiyi mövqe haqqında da qarşı tərəfə məlumat verilib.

Səfir Cuniçi Vada Ceyhun Bayramovu Xarici İşlər naziri təyin olunması münasibətilə təbrik edib. O, Azərbaycanda diplomatik fəaliyyəti dövründə iki ölkə arasında əlaqələrin daha da inkişafı naminə səylərini əsirgəməyəcəyini bildirib.

Görüşdə qarşılıqlı maraq doğuran digər məsələlər ətrafında fikir mübadiləsi aparılıb.

ƏvvəlkiElektron Təhlükəsizlik Xidməti vətəndaşları şəbəkə qurğularındakı təhlükə ilə bağlı xəbərdar edir
NövbətiAzərbaycan İnvestisiya Holdinqi Müşahidə Şurasının ilk iclası keçirilib