Vyanada əməkdaşlıq perspektivləri müzakirə olunub

“Azərbaycan Dəmir Yolları” Qapalı Səhmdar Cəmiyyəti İctimaiyyətlə əlaqələr şöbəsinin rəisi Sevinc Qədirovanın Türk.az-a verdiyi məlumata görə,“Azərbaycan Dəmir Yolları” QSC-nin sədri Cavid Qurbanov və Avstriyanın Federal Nəqliyyat, İnnovasiya və Texnologiyalar Nazirliyinin Baş katibi Andreas Rayxardt arasında görüş keçirilib.

Noyabrın 15-də Vyanada səfərdə olan “Azərbaycan Dəmir Yolları” QSC-nin sədri Cavid Qurbanov və Avstriyanın Federal Nəqliyyat, İnnovasiya və Texnologiyalar Nazirliyinin Baş katibi Andreas Rayxardt arasında görüş keçirilib.

Görüşdə  “Avstriya Dəmir Yolları” Səhmdar Cəmiyyəti idarə heyətinin sədri Andreas Mathe və Avstriya Parlamentində Avstriya-Azərbaycan ikitərəfli parlament işçi qrupunun rəhbəri Barbara Krenn də iştirak ediblər.

C. Qurbanov görüşdə qarşı tərəfə Azərbaycanda dəmir yollarının inkişaf etdirilməsi və müasir tələblərə uyğun qurulması istiqamətində görülən işlər barədə məlumat verib. Bildirilib ki, “Şərq-Qərb” nəqliyyat dəhlizi, o cümlədən Çindən yüklərin Avropaya çatdırılması üçün nəzərdə tutulan nəqliyyat marşrutlarında Azərbaycanın yerləşdiyi coğrafi məkan böyük potensiala malikdir və bu marşrut hazırda Avropaya yüklərin daşınması üçün istifadə edilən marşrutlardan vaxt, qiymət və səmərəlilik baxımından daha üstündür. Azərbaycanda mövcud olan dəmir yolu nəqliyyatı sisteminin bütün müasir tələblərə cavab verməsi və lazımi logistik şəraitin yaradılması da yüklərin sürətli və keyfiyyətli daşınmasına təminat verir. Eləcə də Azərbaycan tərəfinin həmin marşrut üzərində yerləşən bir sıra dövlətlərlə uğurlu danışıqlar aparması da gələcəkdə Avropa ölkələrinə bu dəhlizdən istifadəyə marağını artıra biləcəkdir. Avstriyanın da Avropanın mərkəzində yerləşən mühüm nəqliyyat qovşağı olmasını nəzərə alaraq, qeyd edib ki, Avstriyanın da Azərbaycan üzərindən keçən nəqliyyat dəhlizi layihələrində iştirakı təqdirəlayiq hal olardı.

Avstriyanın Federal Nəqliyyat, İnnovasiya və Texnologiyalar Nazirliyinin Baş katibi Andreas Rayxardt görüşdə bildirib ki, rəsmi Vyana Azərbaycan və Avstriya arasında iqtisadi əlaqələrin dərinləşməsində maraqlıdır. Vitse-kansler Haynts-Kristian Ştraxenin rəhbərliyi ilə oktyabr ayında böyük nümayəndə heyətinin Azərbaycana səfəri və onların dövlət başçısı İlham Əliyev tərəfindən səmimi qəbulu bu əlaqələrin yüksək səviyyədə olduğunu göstərir. O, Avropa-Çin arasında yük dövriyyəsinin yaxın gələcəkdə getdikcə artmaqda olduğunu və ekoloji səbəblərə görə yük daşımalarında dəmir yolunun çəkisinin yüksələcəyini nəzərə alaraq, Azərbaycan üzərindən keçən nəqliyyat dəhlizlərinin böyük əhəmiyyət daşıyacağını vurğulayıb.

Görüşdə hər iki ölkənin dəmir yolu qurumları arasında əməkdaşlığın inkişaf etdirilməsi müzakirə olunub, gələcəkdə bu əməkdaşlığın konkret layihələrə çevrilməsi istiqamətində fikir mübadiləsi aparılıb.

ƏvvəlkiVyanada Dəmir yolları və rəqəmsallaşma mövzusunda biznes toplantı keçirilib
NövbətiMikayıl Cabbarov Vergi Məcəlləsinə təklif olunan dəyişikliklərin detallarını açıqlayıb