“Həzi Aslanovun 110 illiyinin qeyd edilməsi haqqında” Azərbaycan Respublikası Prezidentinin 29 dekabr 2019-cu il tarixli Sərəncamından irəli gələn vəzifələrin icrası ilə bağlı Tədbirlər planı çərçivəsində cəbhəyanı bölgədəki hərbi hissələrdən birində “Hər birimiz Həziyik, hər bir əmrə hazırıq!” devizi altında vətənpərvərlik tədbiri keçirilib.
Növbəti təlimi uğurla başa vuran tankçılar fasilə zamanı bir yerə toplaşaraq iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun xatirəsini ehtiramla yad edib və xalqımızın qəhrəman oğlunun, unudulmaz sərkərdənin davamçıları olaraq Ali Baş Komandanın hər bir əmrinə hər an hazır olduqlarını bəyan ediblər.
Tankçılar qarşısında çıxış edən Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani bildirib ki, respublikamızın bütün bölgələrində, eləcə də Həzi Aslanovun faşist işğalından azad etdiyi keçmiş ittifaqın şəhər və rayonlarında xalqımızın yetirdiyi görkəmli sərkərdənin yubileyi təntənə ilə qeyd edilir. Prezidentin bu tarixi Sərəncamı bütün xalqımız kimi Azərbaycan Ordusunun şəxsi heyətinin də böyük ruh yüksəkliyinə səbəb olub.
A.Qurbani Böyük Vətən müharibəsi cəbhələrində “Cinahlardan zərbə ustası” kimi tanınan Həzi Aslanovun hərbi elmi məqalələri və hərb tarixindəki yenilikləri barədə ətraflı məlumat verib və bu yeniliklərin bu gün də tankçılarımızın müasir orduda istinad etdiyi, peşə təcrübəsindən bəhrələndiyi bir mənbə kimi səciyyələndirilib.
Polkovnik Elşad Əbilov orta məktəbdə oxuduğu illərdə qəhrəmanın Lənkəran şəhərindəki ev muzeyində olduğu günü xatırlayaraq deyib: “Mənim hərbi peşəyə marağım məhz Həzi Aslanovun ev muzeyini ziyarət etdiyim gündən başlandı. Söz verdim ki, mən də zabit olacam, öz həyatımı Vətənə xidmət peşəsinə həsr edəcəyəm. Tale elə gətirdi ki, mən Latviya respublikasında Sovet İttifaqı marşalı S.S.Biryüzov adına Riqa Ali Hərbi Siyasi Məktəbinə daxil oldum. Həzi Aslanovun Belarusiyadakı uğurlu döyüşlərdən sonra Birinci Pribaltika cəbhəsində tank briqadasına komandirlik etdiyi və Liepaya şəhərində həlak olduğu barədə məlumatım var idi. Digər azərbaycanlı kursantlarla həmin şəhərə getdik, generalın müəmmalı şəkildə həlak olduğu yeri ziyarət etdik və söz verdik ki, Həzi Aslanov kimi doğma Azərbaycanımıza həmişə başucalığı gətirəcək, xalqımızın yüksək mənəvi, iradi keyfiyyətlərə malik olduğunu bütün dünyaya göstərəcəyik. Mən artıq arzuma çatmışam. Həzi Aslanovun bütün həmyerliləri də cəbhə bölgələrində Vətən torpaqlarının keşiyində durmaqdan böyük qürur duyur və fəxr edir”.
2016-cı ilin aprel döyüşlərində göstərdiyi şəxsi şücaətə və qarşıya qoyulmuş döyüş tapşırıqlarını yerinə yetirərkən göstərdiyi xidmətlərə görə “İgidliyə görə” medalı ilə təltif olunmuş igid tankçı Paşa Mehdiyev nəzərə çatdırıb ki, bu gün Azərbaycan Ordusunda Həzi Aslanov kimi peşəkar tankçılar yetərincədir. Onlar xalqımıza qələbə sevincini yaşadan Aprel döyüşləri zamanı Həzi Aslanovun layiqli davamçıları olduqlarını bir daha təsdiq etdilər. Biz tankçılar sanki döyüşə deyil, toya-bayrama gedirdik. Düşmənlər silah-sursatlarını, yaralı döyüşçülərini geridə buraxaraq qaçmağa məcbur olmuşdular. Həmin döyüşlərdə göstərdiyi igidliyə görə “Vətən uğrunda” medalı ilə təltif olunan komandirimiz Vilayət Quliyev Həzi Aslanovun hərbi fəndlərindən çox məharətlə istifadə etdi. Gizir Azad Mərdəliyev, müddətdən artıq həqiqi hərbi xidmət hərbi qulluqçuları Tofiq Babayev və Cavad Cavadov əsl qəhrəmanlıq nümunələri göstərdilər. Biz hər birimiz Həziyik. Peşəkarlığımızı, nəzəri bilik və praktiki vərdişlərimizi durmadan artırır və hər an Ali Baş Komandanın əmrlərinə hazırıq!.
Həzi Aslanov haqqında “Həzilər yurdu”, “Tankçılar marşı” ifa olunub, əfsanəvi sərkərdə haqqında şeirlər söylənilib və “Hər birimiz Həziyik, hər bir əmrə hazırıq!” nidalaları altında vətənpərvərlik tədbiri sona yetib.
