FIDE Qran-Pri seriyasının üçüncü mərhələsi: Şəhriyar Məmmədyarov yarımfinala vəsiqə qazanıb

Almaniyanın paytaxtı Berlində şahmat üzrə FIDE Qran-Pri seriyasının üçüncü mərhələsinin yarışları davam edir.

AZƏRTAC xəbər verir ki, Azərbaycan şahmatçısı Şəhriyar Məmmədyarov tay-breykdə almaniyalı Vinsent Keymeri 3:1 hesabla məğlub edərək yarımfinala vəsiqə qazanıb.

Turnirdə ümumilikdə, 16 şahmatçı iştirak edir. Yarışın əsasnaməsinə görə, yarımfinal və final da iki oyundan, ehtiyac yaranarsa, tay-breykdən ibarət olacaq. Qran-Prinin nəticələrinə görə, yarış iştirakçıları reytinq xalları qazanacaqlar. Turnirə aprelin 4-də yekun vurulacaq.

Qeyd edək ki, qrup oyunlarının yekununa əsasən, iyun ayında İspaniyanın paytaxtı Madriddə keçiriləcək iddiaçılar turnirinə vəsiqə qazanan son iki şahmatçının adı məlum olub. Belə ki, hazırkı turnir cədvəlinə ümumi hesabda liderlik edən macarıstanlı Riçard Rapport və ABŞ təmsilçisi Hikaru Nakamura Qran-Prinin son mərhələsinin nəticələrindən asılı olmayaraq artıq iddiaçılar turnirinə vəsiqələrini təmin ediblər.

ƏvvəlkiAzərbaycanın bir güləşçisi Avropa çempionu olub, üçü gümüş medal qazanıb
NövbətiSon sutkada Azərbaycanda COVID-19 infeksiyasına 48 yoluxma faktı qeydə alınıb