Azərbaycanda ipoteka kağızının e-qeydiyyatına başlanılıb

Bu gündən daşınmaz əmlak üzərində ipoteka hüququnu təsdiq edən ipoteka kağızının tərtibi və qeydiyyata alınmasının elektron şəkildə həyata keçirilməsinə başlanılıb.

Bu barədə “Report”a İqtisadiyyat Nazirliyindən bildirilib.

Bu işlər İqtisadiyyat Nazirliyi yanında Əmlak Məsələləri Dövlət Xidmətinin İpoteka Kağızının Elektron Sistemi vasitəsilə reallaşdırılır. Məqsəd elektron xidmətlərin tətbiqini genişləndirərək əlçatanlığı və operativliyi təmin etmək, vətəndaş məmnunluğunu artırmaq, məmur-vətəndaş ünsiyyətini minimuma endirməkdir.

Bu istiqamətdə görülən tədbirlər Azərbaycan Prezidentinin “İpoteka haqqında” Qanuna dəyişiklik edilməsi barədə” 4 dekabr 2018-ci il tarixli Fərmanına uyğun olaraq aparılır.

Əvvəllər bu sənədlər yalnız kağız daşıyıcıda tərtib edilirdi və Mərkəzi Bank tərəfindən kağız daşıyıcıda qeydiyyata alınırdı. Artıq yeni sistem daşınmaz əmlak üzərində ipoteka hüququnu təsbit edən ipoteka kağızının ipoteka qoyanlar tərəfindən tərtib edilməsi, həmin kağızın ipoteka saxlayanların adına qeydiyyata alınması, habelə ipoteka kağızına xitam verilməsi ilə bağlı müvafiq əməliyyatları elektron formada aparmağa imkan verir.

Yuxarıda adıçəkilən əməliyyatların tam elektronlaşdırılması ölkəmizdə kredit, ipoteka və daşınmaz əmlak bazarının inkişafına, bu sahələrdə şəffaflığın və etibarlılığın artmasına töhfə verəcək.

İstifadəçilər e-emlak.gov.az saytına daxil olaraq İpoteka Kağızının Elektron Sisteminə keçid edə bilərlər. (https://ikes.emlak.gov.az/ )

ƏvvəlkiPrezident İlham Əliyev Türkiyənin sabiq Baş naziri Binəli Yıldırımı qəbul edib
NövbətiKaren Donfrid: “ABŞ bölgədə sülh və sabitliyin təmin edilməsi səylərini dəstəkləyir”