M.Maqomayev adına Azərbaycan Dövlət Akademik Filarmoniyasında “Bir millət, iki dövlət” adlı konsert proqramı təşkil olunub.
AZƏRTAC xəbər verir ki, Azərbaycan-Türkiyə qardaşlığına və mədəni birliyinə həsr olunan konsertdə iki ölkənin ictimaiyyət nümayəndələri iştirak ediblər.
Əvvəlcə şəhidlərimizin əziz xatirəsi bir dəqiqəlik sükutla yad edilib, Azərbaycanın və Türkiyənin Dövlət himnləri səsləndirilib.
Türkiyənin Azərbaycandakı səfiri Birol Akgün, Xaricdə Yaşayan Türklər və Qohum Topluluqları İdarəsinin sədri Abdulhadi Turus, Elazığ Mədəniyyət və Tanıtma Fondunun sədri Kadirhan Süngüroğlu çıxış edərək iki ölkə arasındakı mədəni əməkdaşlığın önəmini vurğulayıblar.
Konsertdə Ü.Hacıbəyli adına Azərbaycan Dövlət Simfonik Orkestri dünyaşöhrətli dirijor Bujor Hoinic və dirijor beynəlxalq müsabiqələr laureatı Mustafa Mehmandarovun rəhbərliyi ilə çıxış edib. Solistlər Zeynep Halvaşi (metso-soprano), Feryal Türkoğlu (soprano), Aydın Uştuk (tenor), Mehmet Yılmaz (bas-bariton) və Turqay Coşkun (qanun) mahir ifaları ilə könülləri oxşayıblar.
Proqramda Bujor Hoinicin “Harput” simfonik poeması (10 hissədə), Niyazinin “Türk marşı”, “Qaytağı”, Ü.Hacıbəylinin “Çırpınırdı Qara dəniz” əsərləri və “Sarı gəlin” Azərbaycan xalq mahnısı səslənib.
Sonda Elazığ Mədəniyyət və Tanıtma Fondu tərəfindən hər iki dirijora xatirə hədiyyələri təqdim edilib.
Konsert proqramı tamaşaçılar tərəfindən alqışlarla qarşılanıb.
