“Böyük Qayıdış” Proqramı çərçivəsində Füzulidə məskunlaşan sakinlər, həmçinin Qarabağ və Şərqi Zəngəzurun dirçəlişində çalışanlar üçün səyyar tibbi xidmət həyata keçirdik. Azərbaycan Tibb Universiteti Tədris Stomatoloji Klinikasının həkim heyəti olaraq burada əhaliyə xidmət göstərmək bizlər üçün çox xoşdur.
AZƏRTAC-ın bölgə müxbiri xəbər verir ki, bu sözləri Füzulidə tibbi aksiya zamanı Azərbaycan Tibb Universitetinin Tədris Stomatoloji Klinikasının direktoru İmran Ağayev söyləyib.
“İşğaldan azad olunan ərazilərdə daha əvvəl digər sahələr üzrə tibbi müayinələr təşkil olunsa da, biz kollektiv olaraq ilk dəfədir azad olunan ərazilərdə tibbi müayinədə iştirak edirik. Proqrama uyğun olaraq belə müayinələrimiz davamlı olacaq və digər rayonlarda da sakinlərə xidmət göstərəcəyik. Əsas məqsədimiz əhali arasında diaqnostik və profilaktik işləri həyata keçirməkdir. Çünki ağız boşluğu sağlamlığı insan orqanizmi üçün çox vacibdir. Belə tibbi müayinələr zamanı erkən aşkarlanan problem və düzgün diaqnoz gələcəkdə müalicələrdə böyük rol oynayır”.
Səhiyyə Nazirliyinin təşkilatçılığı ilə Azərbaycan Tibb Universiteti Tədris Stomatoloji Klinikasının həkim briqadası Füzulidə yerli əhalinin müayinələrini aparıb.
Tibbi müayinələr ATU-nun Tədris Stomatoloji Klinikasının direktoru İmran Ağayevin başçılığı ilə klinikanın həkim briqadası, o cümlədən stomatoloq-terapevt, stomatoloq-ortodont, stomatoloq-ortoped, stomatoloq-cərrah və uşaq stomatoloqu tərəfindən aparılıb. Ümumilikdə, aksiya zamanı 100-ə yaxın vətəndaş tibbi müayinədən keçib.
