Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Ulduz” informasiya kommunikasiya texnologiyaları sahəsində maarifləndirmə ictimai birliyi tərəfindən “Fərdi məlumatların mühafizəsi üzrə maarifləndirmə” adlı ikinci təlim təşkil olunub.
Tədbirin açılışında layihə rəhbəri Samir Həsənov çıxış edərək, göstərdiyi dəstəyə görə Azərbaycan Respublikasının QHT-lərə Dövlət Dəstəyi Agentliyinə təşəkkürünü bildirib və informasiya təhlükəsizliyinin cəmiyyət üçün əhəmiyyətini vurğulayıb:
“İnternet dövründə vətəndaşlarımız tez-tez kiberdələduzluq riskləri ilə qarşılaşır. Bu isə bəzən onların ailə büdcəsinə ciddi ziyan vurur. Kibergigiyena qaydalarına əməl edilməsi vacibdir və belə maarifləndirici tədbirlər risklərin qarşısının alınmasında mühüm rol oynayır,” – deyə o qeyd edib.
Daha sonra layihənin eksperti Yusif Süleymanlı təqdimatla çıxış edərək kiberdələduzluq halları, onlarla mübarizə üsulları və müasir təhlükələr barədə iştirakçıları məlumatlandırıb. O, fərdi məlumatların qorunması, sosial şəbəkələrdə təhlükəsizlik, güclü şifrələrin istifadəsi, iki faktorlu təsdiqləmə və dipfeyk (deep fake) təhlükələri kimi mövzulara toxunub.
Ekspert, həmçinin siyasi haktivizm mövzusuna diqqət çəkərək, hakerlərin fəaliyyət istiqamətləri və onların törətdiyi əməllər barədə iştirakçıları məlumatlandırıb. Təlim zamanı iştirakçılar DDOS və fişinq hücumları, eləcə də VPN istifadəsi barədə suallar ünvanlayıblar. Ekspert bütün sualları cavablandıraraq, mövcud müdafiə üsullarını iştirakçıların diqqətinə çatdırıb.
