Hazırda valideynlərin “Rəqəmsal məktəb” platformasında qeydiyyat səviyyəsi 70 faizə yaxınlaşıb. Onlar əsasən platformada müşahidəçi qismində çıxış edirlər.
Bu barədə AZƏRTAC-ın sorğusuna cavab olaraq Məktəbəqədər və Ümumi Təhsil üzrə Dövlət Agentliyindən məlumat verilib. Bildirilib ki, valideynlər platforma üzərindən övladlarının qiymətləri, davamiyyəti və digər qeydlərlə bağlı məlumatları izləyə bilirlər: “Yaxın vaxtlarda məktəbin fəaliyyətinin qiymətləndirilməsi məqsədilə platformada valideynlər üçün rəy və sorğu bölməsi istifadəyə veriləcək. Bununla valideynlərin hesabatlılığı daha da genişlənəcək”.
Agentlik əlavə edib ki, valideynlərin platformaya qoşulmasını təşviq etmək məqsədilə övladlarının profillərini aktivləşdirən valideynlərlə bağlı hesabat hazırlanır: “Müvafiq siyahı Bakı Şəhəri üzrə Təhsil İdarəsinə və təhsil müəssisələrinə təqdim olunur. Sinif rəhbərlərinə valideynlərlə görüşlərin təşkili və məlumatlandırıcı söhbətlərin aparılması tapşırılır”.
Bununla yanaşı, valideynlər platformada direktorla çat vasitəsilə əlaqə yaradaraq təklif və müraciətlərini bildirə bilirlər. Agentlik bildirir ki, rəy və sorğu bölməsi aktivləşdirildikdən sonra bu müraciətlərin məzmunu üzrə statistik göstəriciləri izləmək mümkün olacaq.
